Ang Commission on Population and Development – Caraga kauban ang kaabag niini nga civil society organization nga Sibog Katawhan alang sa Paglambo kon SIKAP gipalapdan ang pagpakaylap ug impormasyon ug kaalam mahitungod sa sexual ug reproductive health ngadto sa manag laing grupo sa mga lumad pinaagi sa gipahigayong aktibidad nga “Engaging the Indigenous People to a dialogue on the Universal Human Right to Sexual and Reproductive Health” kaniadtong Enero 25, 2021.

Kapin 40 ka mga lider sa mga igsuong Manobo, Higaonon, ug Mamanwa sa munisipyo sa Santiago ug Jabonga, Agusan del Norte ang naka sakmit sa giingong aktibidades aron maduso ang impormasyon mahitungod sa ilang katungod ngadto sa sexual ug reproductive nga panginahanglanon.

Ang maong katuyuan gihimo sa mga mga nahisgutang ahensya aron musaka ang kasamtangang ihap sa mga nag gamit ug serbisyong family planning aron munaog ang kaso sa unwanted pregnancy sa rehiyon.

Lakip usab gi panday sa maong kalihukan ang paghatag ug kamahinungdanon sa mga special population groups nga gilangkoban sa mga lumad kon asa gitudluan kini sa saktong pagplano sa pamilya aron sa mas haruhay nga pamuyo.

Gisuta usab ni POPCOM Caraga Regional Director Alexander A. Makinano ang importansya sa saktong pag plano sa pamilya kon asa makatabang kini aron makab-ot kanunayong pagsaka sa ekonomiya ug pag uswag sa komunidad.