Ang Commission on Population and Development Caraga ipadayon ang paghipos ug pagripaso sa mga impormasyon sa gidaghanon sa katawhan ug gidakon  sa yuta sa tanang  barangay sa rehiyon sa Caraga alang sa preparasyon sa vaccine deployment niining tuig sa 2021.

Kauban sa Department of Health, ang Commission gitarget nga mamahimong hapsay ang pagpang-apud apud sa mga bakuna ngadto sa katilingban aron mahatagan ug katapusan ang suliran ug kaguol nila mahitungod sa COVID-19 infection.

Ang mga datus ug impormasyon bahin sa land areas sa tagsa tagsang barangay sa rehiyon, gamiton sa gipahigayong pag plano sa National COVID-19 Vaccination Deployment Plan ug mahimong magmalampuson kini sa pagahimuong pagbakuna sa intero Caraga.

Armado ug andam na ang mga impormasyon sa Commission gikan sa Department of Environment and Natural Resouces Regional Office ug gitaganang mapadala na kini ngadto sa kauluhan.

Sigon usab ni POPCOM Caraga Regional Director, Alexander A. Makinano nga usa ang POPCOM sa mga ahensya nga gisaligan sa malampusong pagsugpo sa COVID-19 virus. Gi suta usab ni RD Makinano nga ang nakuhang impormasyon, mamahimo usab dugang mekanismo sa Demographic Vulnerability Tool sa ahensya nga gikonsiderar nga armas sa pagkontra sa COVID-19.

Gikatuaw usab ni RD Makinano ang dakong alagad niining programa sa pagkab-ot sa mga Karaganon sa hapsay ug kalinaw nga panginabuhi hilabi na sa dakbayan sa Butuan kon asa gikonsiderar nga hotspot sa mga positibong kaso sa COVID-19 virus.