Ang mga rehiyonal nga buhatan sa Commission on Population and Development kon POPCOM ug Department of Social Welfare and Development (DSWD) maglagda og kasabutan aron pakusgan ang mga pamaagi ug inisyatibo sa Responsible Parenthood and Family Planning o RPFP ug Adolescent Health and Development Program mao ang AHDP pinaagi sa Pantawid Pamilyang Pilipino Program o nailhang 4Ps.

Malaumon ang duha ka-buhatan nga pinaagi sa pagpirma sa partnership agreement, mahalapdan ang pagpahigayon sa Responsible Parenthood and Family Planning sessions pinaagi sa Family Development Sessions (FDS) ug ang Adolescent Health and Development (AHD) sessions gamit ang pamaagi sa Youth Development Sessions (YDS).

Dugang pa niini, mouyon ang duha ka-ahensya sa pagpadayon sa mga kalihokan nga gilatid sa Memorandum of Agreement aron sa pagkab-ot sa tinguha niini, lakip na ang data collection and research, pagpalihok, sa pagpakigbahin ug pagbinayloay sa datasets, ug paningkamot para sa adbokasiya.

Gi-ila ang kamahinungdanon sa panaghiusa sa mga plano ug programa aron sa pagkab-ot sa gitinguha nga mga tumong nga mupalig-on sa kapasidad sa matag pamilya, indibidwal, ug komunidad aron sa pagkab-ot sa haruhay ug hapsay nga pamuyo. Apil usab niini ang pagpanalipod sa social welfare ug pagpalambo sa social development sa matag indibidwal taliwala sa mga pandemic.