Sayu nga pagsulod sa seryoso nga relasyon nga miresulta sa pakighilawas, pag uyab-uyab ug sayo ang mga gikabutyag nga hinungdan sa sayo nga pagmabdos sa mga kabatan-onan sa syudad sa Cabadbaran. Kini ang nasayran sa bag-ohay pa nga gipahigayon nga Program Design Workshop sa Social Protection Program for Adolescent Mothers and their Children.

Pinaagi sa Rapid Appraisal nga gipangunahan sa City Population Office sa Cabadbaran, nasayran nga ang 55 ka mga inahan nga nag edad 18 taman 24 ang nakaagi ug sayo nga pagmabdos isip menor de edad. Gibutyag sa survey nga ang sayo nga pakighilawas ang pinaka unang hinungdan sa ilang sayo nga pagmabdos nga nabutang sa 47%, ikaduha ang sayo nga pag uyab-uyab, 22%, ug ikatulo ang mao daw kini ang ilang pangandoy nga nabutang sa 16%, ikaupat ang problema sa pamilya, 12%, ug ikalima ang sayo nga paghigugma nga nabutang sa 3%

Gi apil usab sa survey ang mga batan-ong inahan nga nag edad 18 taman 24. Base sa ilang mga inahan, ang sayo nga pag-uyab uyab ang nag unang hinungdan sa pagkaburos sa ilang mga anak, nga nabutang sa 31%, ikaduha ang dili maminaw sa tambag, 24%, ikatulo ang pagpananghid nga mag module pero uyab ang giatiman nga nabutang sa 14%, pagkalaagan, barkadista, pagkabulag sa pamilya, ug kalisod sa kinabuhi ang mga naulahing hindungdan, matod pa sa survey.

Ang maong mga datos maoy basehan sa City Population Office sa Cababaran sa pagpatugyan sa SPPAMC kauban ang Commission on Population and Develoment – Caraga Region, alang sa paglambo ug kaayuhan sa mga batan-ong inahan ug ilang mga anak.